®§(*§*)§®¤*~ˆ°الـــــــــــذاهـــــــــبــــه °ˆ~*¤®§(*§*)§¤*
الله اللي راد والعقـده قضاهـا اللـي عقدهـا
لاعلى الدنيـا سـلام ولالباقـي العمـر زينـه
الفضـا ماكنـه الا خيمـة طاحـت عمـدهـا
والفـرح ماكنـه الا شيـخ انقصـت يديـنـه
والعمر قطعة زجاج انكسرت ولاطـال امدهـا
والعرب في العيد بدمـوع اليتامـى مستهينـه
والشوارع لفها ثـوب الظـلام اللـي هجدهـا
والبيوت اطلال من عقـب المحبـه والسكينـه
والشتا والليل والبرد وسمـا يصـرخ رعدهـا
والعيون اللي ورا الشبـاك مذعـوره حزينـه
طولوا بالكهف الاصحاب وبقت روحي وحدها
كنها في كوكـب ثانـي خـلا مـن ساكنينـه
الوداع اللي بعلـم العيـن يعبـر مـن رمدهـا
والوداع اللي بلا علم القفص صـدري غبينـه
والوداع اللي بلا رجعـه علـي امـر وادهـا
والله انـه غرغـرت سـم وسكاكيـن سنينـه
والعنود اللي جفيـت النـاس والدنيـا بعدهـا
مدت الفرقـا لغاليهـا وهـي تعطـي الثمينـه
وينها كيف تركتني ليـه ماجـت فـي وعدهـا
والقمر لا طل وخابرهـا تجـي بينـي وبينـه
رحت أنادي واتلمس في مهـب الريـح يدهـا
كني حصان بلا صاحب طـوى البيـدا حنينـه
رحت أصيح الصبح وينه والعرب مارد احدهـا
ماسمعت الا صدى صوتي يقول الصبح وينـه
كلهم من يوم ذيك الشمس غابـت عـن بلدهـا
طلعونـي بالنفـود وصكـوا أبـواب المدينـه
كلهم من يـوم ذيـك الذاهبـه محـد وجدهـا
كل رجال من الشرهه قلع فـي الـدرب عينـه
أثرها ماتت وماتت كـل فرحـه فـي مهدهـا
والربيع أقفت به اللـي كانـت التـاج لجبينـه
جاورت عقب الحدايق حفـرة ماقسـى لحدهـا
حفرة ماني مصـدق كيـف ضمـت ياسمينـه
للحزن فينـي مثـل ماللطهـاره فـي جسدهـا
ويش أسوي لافتشت اللي لها وسـط الخزينـه
زخرفت حلم وبنت له مسكن وسمـت ولدهـا
آه لـو غـرت ولدهـا فـي خميلـة والدينـه
عاهدتني وقفرت بيميـن أقـوى مـن عهدهـا
والصميلا خيـر فيـه ان كـان مانفـذ يمينـه
ماتثقـا عـن رثاهـا عـرق اقتـض بشهدهـا
ولا تبقى خلف قضبان الجفن عـذرى سجينـه
كيف عند العالم أيام العزى ماحصـى عددهـا
ولا انا طالت شبـوره والله أعلـم كـم سنينـه
لا الثرى فيها نبات ولا المشيخ أخفـف نكدهـا
لا السما فيها طيـور ولا البحـر يمـه سفينـه
لا القمر هذا مساه ولا الأسـي هـذا أرغدهـا
لا الزهر هذا شـذاه ولا الذهـب هـذا رنينـه
قالوا الشيخ الفلانـي مرجـع القـوم وسندهـا
قال لي ابشر بالعوض والعلـم جينـاه ناقلينـه
ساق لك بدر البدور اللي نشدهـا مـن نشدهـا
جادر هـزت عـروش وخيبـت روس ذهينـه
قسمها في رسمها في جسمها الا فـي رشدهـا
واسمها ان جا للغضب قومه على الألسن رطينه
اترك النـاي وعطيـة شيخنـا غنـى لسعدهـا
وانبسط ياعم وانسى اللـي ورا التربـه دفينـه
قلت ولصـدري تناهيـد تـروع مـن شهدهـا
آه واويلاه مـن يجلـب علـى قلبـي ظنينـه
خلوا أغلى ذاهبه ترعـى ربيـع اللـي فقدهـا
والعطـا راعيـه محـد صوبـه الله لايهيـنـه
لو ضمنـت الجنـه تفاحـة القلـب وشهدهـا
قلت من بكره عسـى مجنونهـا تاقـف سنينـه
من ابداع ناصر القحطاني
|