مالنا فيك يالطيب نصيب
مرثية في صاحب السمو الملكي الأمير/ فهد سلمان بن عبدالعزيز ( رحمه الله )
مالنا فيك ياالطيب نصيب
الله اللي كتب هذا السفر
جيت دار الفنا مثل الغريب
ورحت عنها مراويح المطر
كن ودك تغيب ولا تغيب
صرت مثل السنابل والزهر
يافهد وش نقول انك حبيب
صافي الحب في قلبك نهر
يافهد وش نقول انك قريب
اسأل العين عن قرب النظر
يافهد نكتبك لطفٍ وطيب
أو نعزي بك رجال الفخر
يافهد .. نندهك ليتك تجيب
فاقدينك مثل شمس وقمر
سهم الأقدار يقتل من يصيب
يالله انا .. رضينا بالقدر
بس في صدورنا دمع ونحيب
لو نثرناه .. ذوب له صخر
***
سلمى
في رثاء سلمى السعود الرشيد جدة الأمير بدر رحمها الله
ما نشدت الشمس عن حزن الغياب
علمتنا الشمس نرضى بالرحيل
كل يومٍ يغرق الضي افـ عباب
ما سمعنا ناعي ٍ .. مابه عويل
وما هقيت الموت يجرحني جواب
لين شفتك في سما عمري اصيل
علميني ياللي كفوفك سحاب
وابتسامك غيث واهدابك نخيل
وش أسوي لا دخل فصل الضباب
وكفت عيوني وضيعني الدليل
حاجتي والشيب بهديني الصواب
حاجتي لك ما مضى افـ عمري حصيل
آه يا سلمى مضى وقت العتاب
والحديث اللي باقوله لك طويل
اعتذر يمه حصل مني غياب
واعتذر ازريت لا ارد الجميل
من يجازيك وعطاياك الشباب
والله العالم ترى ماني بخيل
يوم انا عاري غديتي لي ثياب
وان شكيت الضر شافيتي العليل
ويوم كبر الطفل ولمتي الزهاب
كل ما في الكون من طبعٍ جميل
هي درت حايل وهذيك الهضاب
عن غيابك هو درى الروض المسيل
بنت من لا ثوروا فوق الركاب
ما يباريهم سوى نصل وأصيل
واخت من لا كسرت سمر الحراب
من عنيف الطعن ردوا للصقيل
وام من جدانهم مثل الشهاب
كاسبين المجد من جيلٍ لجيل
يالله المطلوب يا جزل الثواب
تجعل الجنة لها ظلٍ ظليل
***
بكا ريح على صدر ديجور
قصيدة البدر في رثاء والدته الأميرة وضحى الحمود الرشيد - رحمها االله
طيري عصافير السحر عن هدبها
عينٍ تخم النور .. من قلة النور
كود الظلام اللي علق في عصبها
وعروقها تبكيه حسرات وغرور
الله .. مااثقل جفنها وإن جذبها
برقٍ لمحت فـ ضيه اكفان وقبور
على الدروب اللي عشقنا تعبها
لين اقفرت من كل حيٍ ومعمور
كنه يلج بوسط سمعي صخبها
أو هو بكا .. ريحٍ على صدر ديجور
طيري عصافير الهوى اللي شربها
غدير .. واسقاها من أوهامه بحور
يكفي عن أحلام الحياة وطربها
لو ساعةٍ ببكي على ساعة قصور
أصيح شمسٍ ما تمن بذهبها
تنثره قلبٍ صادق .. ودافي شعور
والا النهار اللي عيوني حربها
اقبالته لحظه.. وغيباته دهور
أصيح عسبان الحياة ورطبها
أو حبها اللي توَّه اليوم مبذور
والا الضلوع اللي حنيني كتبها
شعرٍٍ قراه الصبح غامض ومكسور
اصيح من باصيح واغلى عربها
شدوا زمان الشوك باعشاب وزهور
يا حيف وضحى نور عيني جنبها
وخذت غياب الشمس من مرتع الزور
وخذت وعقرت مهرتي في طلبها
وقفت .. ودمعي في محاجره .. مذعور
ما غير أناظرها ويصغر لهبها
لين إنطفت ناديت يا سعود ماجور
خذها الذي من فيض جوده وهبها
يوم لنا رحمة.. وظل .. وذرى سور
ياعلها عنده بعالي رتبها
عند الذي نزه مقامه عن الجور
وطيري عصافير السحر عن هدبها
عينٍ تخم النور .. من قلة النور
***
سهيل العنود
في رثاء صاحبة السمو الملكي الأمير العنود بنت عبد العزيز. رحمها الله و اسكنها فسيح جناته.
ان بكى الليل والدمعات سود
وسال كحل ٍ على قمرا الخدود
أعرف انه هوى نجمٍ فريد
مثل نوره سديم بلا حدود
حسبي الله عدد ضي النجوم
ورحمة الله على سهيل العنود
عمتي يشهد الله عمتي
هذا حق النسب وأغلى الجدود
وعمتي في المحبة والعطا
وعمة الناس يالقلب الودود
والله أكبر خذت منك السنين
كثر ما غيبت منك اللحود
والله أكبر خذيتي من السنين
كل ما يجعل الذكرى خلود
وأكثر الناس حقٍٍ في البقا
من إلى بخلت الدنيا يجود
ويحمد الله على طول الحياة
من قصَرها على تقوى وسجود
ما على الزهر لومٍ لو بكى
وذير الصوت غزلان النفود
خلّ نجدٍ تبوح بحزنها
قبل تنسى معــالمها النجود
كل شي مرده للزوال
وكل عبدٍ .. لخلاقـــه يعود
***
مشعل الدين
قصيدة في رثاء سماحة الشيخ عبدالعزيز بن باز ( رحمه الله )
ماد صرح السماحة وانهدم
طبت حي .. وميتٍ يالعلم
مشعل الدين يابحر التقى
قلعة العلم يانهر الشيم
مبصر القلب يخشاك الظلام
كف شوفك وبصرت الأمم
جتك الأيام بأغلى كنوزها
رامك التبر واخترت القلم
وجتك الأيام والفجر الخميس
كنت روحٍ تصلي في الحرم
سيد الزهد سلطان السماح
طاغي اللطف مبذول الكرم
والله ان لك من الفضل الغزير
كثر مافي المقابر من رمم
جود ربي وعطفه والفلاح
للذي صانها قلبٍ وفم
وخلده ربي وريفه والظلال
للذي شال للإسلام هم
ونور ربي وفضله والرضى
للذي ما رضي سفكٍ لدم
مات بن باز كل حيٍ يموت
ووجه ربك هو الموجود تم
ندعي الله بحسن المعاد
طبت حيٍ وميت يالعلم
|